達美旅遊 美食之旅 Tammy Travel

會員專區

2014 年 07 月 02 日 jack

15億钜資打造全國唯一阿拉伯風情《清遠獅子湖喜來登酒店》、【包乘坐觀光船夜遊獅子湖】美食純玩二天團

早排跟左達美旅遊美食之旅既團,係車上聽導遊猛甘SELL個叫做『阿拉伯風情』清遠獅子湖喜來登酒店二天團,搞到我心鬱鬱,想試下跟呢個團。於是六月頭去左報名,好幸運咁又比我報到名喎,不過要坐車尾,因為差唔多全團爆滿啦。呢個團睇黎都真係幾heat下喎,因為聽達美門市D職員講,同日已經收滿左三車啦,其他兩車都FULL晒,淨系有一車仲有兩個吉位,睇黎呢個團去得過。

到左6月21號早上,團號:GSI2,15億钜資打造全國唯一阿拉伯風情《清遠獅子湖喜來登酒店》、【包乘坐觀光船夜遊獅子湖】美食純玩二天團正式開始,一大早,羅湖一片藍色旗海飄洋,個個導遊都面帶笑容咁同你講:早晨呀!令人感覺到距地好熱情、好NICE,呢次帶團嘅導遊叫:李海,高大威猛,黑黑實實,講野非常之淡定,好風趣同詼諧,服務態度一流。

到左皇崗後,因為果日係禮拜六,美食之旅都有好多團,所以等多一陣都可以理解嘅,導遊係接皇崗班團友時真係等耐左少少,再加上早上又落大雨,不過唔緊要啦,出黎玩,大家互相體諒啦。終於全車上齊晒啦,開始我地『清遠獅子湖喜來登酒店兩天之旅』LU。係車上,導遊無因為時間長而停低講野,沿途一路有講有笑,講解清遠風土人情,再加上導遊講自己系清遠人,所以講嘅清遠知識方面相對詳細,第一站我地黎到廣州花都食飯嘅餐廳,餐廳名叫:楊屋酒家,花都屬於廣州郊區,導遊係車上介紹左中午食乜餸,菜式有:白菜煲陳腎、妙香雞、清蒸鯇魚、 農家碌鵝、片皮鴨三食:鴨皮片、蘭豆炒鴨片、涼瓜炆鴨、住家巧手釀豆卜、巧手蒸粗齋、鹽水時蔬、白飯、生果,我地呢團人數50人,五圍台食飯,每圍坐10個人,唔太迫,啱啱好,菜式份量好夠食,特別個雞同碌鵝,係香港食唔到甘好味嘅,好地道嘅農家菜。

食完飯後,我地去到當地一間Supermarket——大潤發超市,行左45分鐘左右,全車人準時上番車,花都離清遠車程唔太遠,所以好快就到左第二個景點:朱汝珍公園,呢個公園主要紀念清遠人朱汝珍嘅生平事蹟,入面好多都係雕塑人像。因為天氣唔係咁好,團友都要求遊覽時間縮短D,早D返酒店。跟住落黎,我地就去到戲肉啦~~遠獅子湖喜來登酒店。酒店大門有個印度人迎賓,無幾遠就見到主樓,一棟阿拉伯風格建築,酒店大堂好有一種高貴嘅中東豪門氣派,金光閃閃,入到房間,都幾大下,洗手間都好大,仲有個大浴缸,房間出面有個大露台,坐係度望住個湖景,真系好寫意。

我放低行李之後,HEA左一陣,當然要四圍逛下啦,酒店設施真係好齊全,分別有:室內及室外泳池、水療、健身室、兒童遊戲室、園林花園、中西式餐廳等等應有盡有。行左一陣,夠鐘去食自助餐,自助餐係一樓,入面D野食品種好齊全,包括世界各地、各式各樣菜式應有盡有,冰鎮海鮮、日本刺身、壽司料理樣樣都有齊,另外仲有清遠當地特色野:清遠雞,味道啱晒我口味。甜品款式多不勝數,仲有鐵板類、燒烤類、灼檔、油炸類、冷盤類、熱盤類,起碼超過一百款,而且服務人員質素訓練得幾好下,值得一贊。

晚餐過後,導遊安排我地夜遊獅子湖,近距離觀賞亞洲音樂水幕噴泉,去到見到有4隻叫做“BBQ”嘅觀光船,每船坐8個人,當晚達美有四個團,所以都要分時間去坐遊船,我地全團安排晚上8點遊船河,坐上船後,D酒店夜景好靚,再加上有個五光十色嘅音樂噴泉,真系靚到絕。雖然天氣炎熱,但係湖上,清風送夾,感覺一 D都唔會焗熱,本來期待有水幕電影,但系當晚只有音樂噴泉,4首歌曲嘅時間左右,就要開始回程。感覺有點可惜,因為冇睇到號稱亞洲第二大嘅水幕電影。但係唔緊要啦,其實我已經覺得好ENJOY啦。聽導遊講呢個團上年係賣緊$698,而且夜晚係食中式圍餐,冇自助餐食,仲要冇遊船坐,但係今年經過達美同酒店努力爭取,唔單止價錢方面平左好多,而且仲可以升級安排食酒店自助晚餐。另外仲有一個好強嘅賣點,達美係《全港獨家》可以安排夜晚坐遊船睇音樂噴泉嘅旅行社,其他旅行社諗都唔洗諗,呢D咪叫做江湖地位囉,令我地感受到跟達美出黎玩嘅果份尊貴感覺,真係有錢都買唔到架。

夜遊完之後,順便係附近再周圍行一陣,係室外嘅燈光影照之下,望住阿拉伯風情嘅夜景,別有一番味道。我同行嘅另一個朋友,佢係攝影發燒友,揸住部相機不停影呀影,仲帶埋腳架黎,你都咪話佢唔專業,拍得住達美D導遊架。後黎我地仲發現附近有一間清吧,可以飲下啤酒,吹下水,真係超級寫意。

早上一覺訓醒後,落樓食番個自助早餐先,早餐供應都好豐富下,五星級標準,食物真係應有盡有,同尋晚嘅自助餐一樣,款式都係中、西合壁,正呀,真係食到好飽。早餐過後,係酒店繼續HEA,到11點鐘,全部人CHECK OUT。導遊係車上都有提醒D團友有無漏低野,叫大家檢查多一次。幾分鐘後,我地终於要離開呢間酒店啦,真係有D唔捨得。之後我地坐左大概15分鐘車,就到達食中午飯嘅地方:清遠綠茵酒家,學導遊話齋,黎到清遠,無理由唔試下當地最出名嘅走地雞啦,所以呢餐,我地會享用清遠麻雞,聽到D菜名都流曬口水,而家先讀D菜名比大家聽下先:老火例湯、白切雞、脆皮炭燒雞、脆皮燒肉、農家竹香肉/12件、清蒸邊魚、蒜蓉肉碎蒸絲瓜、大盤腐竹蒸排骨、碧綠炒藕皮、蒜茸炒時蔬、特色東沙坊粉、生果。隻雞好好味,除左隻雞之外,仲有樣菜係好特別架,就係『農家竹香肉』,真系第一次食呢味菜,距係用竹葉或粽葉包住腩肉,中間夾住粉葛或芋頭,用高溫蒸透,入口即溶,我地呢圍台好鍾意,另外有個東沙坊粉,係當地特色小吃,導遊介紹係連州農戶種植,粉質細膩,久煮唔爛,入口爽滑,好味。

午飯過後,我地仲要行多一個景點,就系花都嘅“小天壇”- 圓玄道觀。導遊介紹其整體建築以仿古“天壇”形式建造,所以有小天壇之稱,因天氣炎熱,附近無乜遮陰地方,所以行左一陣,影左幾張相,D人都陸陸續續番上車了,不過小天壇都真係幾有氣勢,值得一睇。

我地係花都坐車番深圳途中,導遊一路都繼續不停甘講解同埋推介線路,佢好落力介紹我地參加D平靚正嘅團,仲有近期推出嘅摘水果線,睇完之後,好有衝動聽日就去報名。另外,導遊仲介紹我地用一個查詢報名好慳時間嘅方法,就系用WHATSAPP查詢啦,再唔系就關注達美旅遊嘅WECHAT,佢話可以透過WECHAT收到好多新行程資訊,仲教埋我地點樣用手機關注WECHAT添,因為車上老人家都幾多,導遊好有耐性咁教距地點樣用手機掃果個QR CODE。整個旅程,我地大家都玩得好開心,咁嘅團費有咁嘅五星享受,真系好抵玩,番到屋企我會一定會推介俾我D親戚朋友。

朱汝珍公園

獅子湖喜來登酒店

戶外泳池

酒店自助晚餐-冰鎮海鮮

各式甜品

 

阿拉伯風情醉人夜景

BBQ遊船

音樂嘖泉

東沙坊粉

農家竹香肉

清遠走地雞

圓玄道觀

小天壇

 

...

 
^

會員登入

會員功能即將啟用
敬請密切留意~!!!