達美旅遊 美食之旅 Tammy Travel

會員專區

2014 年 12 月 12 日 包團部

流浮山商會-新會龍泉渡假酒店兩天遊

一大早係深圳灣關口見到靚仔導遊舉著達美旅遊.美食之旅的藍色旗子等候我哋,離遠就可以見到我們社團的集合牌,因為我哋個團好多老人家,呢個少少細節上嘅安排,已經令到我哋感覺好窩心,好快團友陸續出關報到。

9點接齊團友出發,一上到旅遊車感覺好舒適,安排2部49座豪華旅遊大巴,車上座位寬敞舒適,最緊要係車廂清新乾淨,車上仲有WIFI添,就由如此貼心的服務開始我們兩天愉快嘅旅程啦。

中午約12點左右到達餐廳,係中山南頭孖寶飯店享用《皇牌美食推介鬼馬泰皇咖喱雞》,一落車沿著曲折的小橋及小路慢慢行入餐廳,放眼望去餐廳別具一格,古色古香的裝修吸引住我,俾人一種小橋流水人家的寫意感覺,導遊在車上有提前介紹用餐的菜式,用餐時也再一次現場介紹:老火例湯、鬼馬泰皇咖喱雞、冬菜蒸回味魚、火腩燜白茄、瑤柱扒瓜甫、香芋燜青頭鴨、頭菜蒸肉餅、勝瓜白貝浸木耳、膠筍炒魚餅、蒜茸時蔬、時令生果,我哋總共8圍枱,餐廳安排一間包房比我地用餐,其中有4圍枱安排坐11、12人,餸菜份量都好足,主要農家菜為主,咖喱雞賣相唔算好睇,但味道真係一流啊,仲有啊,午餐前後我哋D團友都紛紛影相留念。

午餐後乘坐約1.5小時的車程黎到江門市,沿途經過新會碧桂園酒店,導遊有介紹入住該酒店,食足6餐嘅線路俾客人,到達【新會陳皮村】,我地跟住導遊嘅旗進入參觀,景區建築及裝修主要以竹為主,設計觀念亦都係圍繞竹,做到環保及創新,淨係呢樣野就已經值得影相留念啦,再跟著導遊旗子沿途參觀,一片片半成品陳皮盡收眼底,係呢度可以瞭解到如何由橘皮到陳皮的一道道工序和過程,聽完導遊介紹我真係學到好多野啊。在景點逗留約45分後上車繼續前往下一站,當日氣溫相對較為高,室外溫度都有20幾度啊,但上返車感覺相當舒服,哦,原來係司機哥哥提前20分鐘開左冷氣,真係考慮得好周到啊。

真係一日落黎食唔停口啊,特色下午茶《龜苓膏+五豆糕》,歎完下午茶消化下,20幾分鐘車程就黎到【新會學宮】,導遊講解吸引團友跟住沿途參觀,“儒”“釋”“道”三教講解如此得出神入化,加入個人語言同肢體嘅表達方式,真係忍唔住都要俾D掌聲佢啊,達美嘅導遊真係好專業。

17:30左右到達餐廳,又到食飯時間,主題餐:吾淑吾食GIGI姐推介《廣東葵鄉三寶雞+水蟹燜老鵝公》,用餐前導遊代表公司致辭,然後有請商會主席馮生上台與團友講野,隨著一陣陣的掌聲拉開圍獎抽獎序幕,導遊派發每人一個利是封,裡面有一張四字詞語的祝福語,每圍枱以10人為基數,10人手上的詞語都唔一樣,11人一圍枱的多一個重複的詞語,然後導遊將十張不同的祝福語擺入抽獎箱內開始抽獎,禮物擺係旁邊的枱,有鑰匙扣、指甲鉗套裝及雨傘,中獎的朋友一起上台攞獎合影,團友個個好開心,雖然禮物不算貴重,都係實用同埋貼心。遊戲結束後準備上菜開餐,導遊係車上介紹菜單時我已經流口水了,有:葵子豬骨瘦肉湯、葵鄉三寶雞、淮山燜燒鵝、水蟹燜老鵝公、豉汁蒸西江鉗魚、瑤柱節瓜甫、豉汁杜阮涼瓜皮、新會陳皮骨、泰汁自磨山水豆腐、田園時蔬、瓦煲臘味飯、時令果盤,全部係當地地道的特色菜,香港係食無到哩個味道嘅,三寶雞好好味,皮爽肉滑啊,水蟹燜鵝味道好鮮好野味,臘味飯味道好正啊,我都食3碗啦,仲有用新會當地特產及方式烹飪的杜阮涼瓜皮同陳皮骨,味道都唔錯,食飽飽返酒店啦。

 

19:30左右入住全新開幕準五星級新會《龍泉渡假酒店》500呎超大豪華客房,酒店坐落於圭峰山腳下,周邊環境寧靜舒適,係度假嘅好去處,客房夠大夠闊落,裝修頗為精緻,重點係夠乾淨企理,雖然現時天氣開始凍了,酒店嘅人工沙灘也關閉了,但沿著沙灘邊嘅小橋步行去欣賞,都有一番唔錯嘅景色。晚上與白天的感覺完全唔同,夜晚的燈光照射整座酒店大樓,有種金碧輝煌嘅感覺,早上起身出到露台,外面空氣好清新啊,真係要索多兩啖啊,遠離大城市嘅喧嘩,放慢腳步盡情去放鬆,感覺一身疲憊都全部都消失晒啦。

8點起身食早餐,西餐廳環境唔錯,幾十款嘅品種,有熱盆、扒類、粗糧類、灼檔、糕點、新鮮嘅蔬果,最值得一提嘅系餐廳原汁原味噶豆漿,濃郁香淳,唔系我哋係屋企用豆漿機打出來果種FEEL,真係一道道工序煮出來嘅,感受綠色嘅有機早餐。趁導遊辦理退房,再去周圍行下照下相先,酒店前嘅噴水池裏面,有好多錦鯉游來游去,團友們個個搶住同佢地合照啊,酒店還有一座座依山而建嘅別墅,雖然算唔上世外桃源,但絕對可以令人身心舒暢 ,有機會想再黎多次啊。

離開酒店後前往中山【星步飛STAR BUFFET海鮮自助餐】,落車後跟住導遊旗子坐扶手電梯去到4樓,餐廳門口已經排晒長龍啦,導遊安排我哋入座之後,個個都急急腳去搵食啦,結合中外菜式約200多款,最吸引我嘅係新鮮空運澳洲海鮮、肥美嘅三文魚、繽紛嘅貝類、現場嘅煎扒及多款美味嘅甜品,一次過滿足晒我嘅需求,味覺真係前所未有,餐廳裝修好有異國風情,國內有咁嘅水準真係相當唔錯,借用導遊的一句說話:真係“個個都攪大個肚啊”。

回程導遊派發佢地公司新鮮出爐嘅聖誕節單張,嗱嗱聲搵條靚線路,下次成班朋友再一齊去玩下先。導遊推薦左好幾條聖誕出發嘅人氣線路、還有幾條熱門嘅歎五星級酒店線路,另外仲有推介達美獨家首創嘅“溫泉八段錦”線路;兩天旅程導遊講解好趣致,服務態度也好熱情。最後,導遊係自己個八寶袋裡面拿道具,然後整返首龍舟歌送俾大家,車上個個拍爛手掌啊。

約5點返到深圳灣關口散團,結束兩天愉快嘅行程。首先感謝達美旅遊.美食之旅嘅行程安排,無論食、住、玩,個個團友都贊不絕口,再加上你地用心服務、趣緻鬼馬嘅導遊,令到整個行程更添幾分樂趣。

...

 
^

會員登入

會員功能即將啟用
敬請密切留意~!!!